ემანუელ მაკრონი - რუსეთის მხრიდან ესკალაციის ფონზე, მნიშვნელოვანია, ერთობლივად უზრუნველვყოთ უკრაინა ყველა საშუალებით, რაც მას თავის დასაცავად სჭირდება.
უკრაინის პრეზიდენტის, ვოლოდიმირ ზელენსკის განცხადებით, საფრანგეთის პრეზიდენტ ემანუელ მაკრონთან შეხვედრაზე რუსეთის ქმედებების საპასუხო სხვადასხვა გზა განიხილეს.
“ემანუელმა და მე ერთად განვიხილეთ ამ ქმედებების საპასუხო სხვადასხვა გზა. კერძოდ, მიმდინარე თვეში მივიღებთ ახალ პაკეტებს, რომლებიც ჩვენს საბრძოლო ავიაციას გააძლიერებს. ასევე, ვაჩქარებთ მუშაობას ევროპულ ანტიბალისტიკურ თავდაცვის სისტემაზე - FREYJA წლის ბოლომდე უნდა ამოქმედდეს. მადლობას ვუხდი ემანუელს: საფრანგეთის მიერ უკრაინისთვის დაპირებული შეიარაღების წარმოების ყველა ლიცენზია უკვე მიღებულია. ახლა მნიშვნელოვანია, რომ ეს საკითხები გუნდების დონეზე დაუყოვნებლივ განხორციელდეს”, - აღნიშნა ზელენსკიმ.
თავის მხრივ, ემანუელ მაკრონმა განაცხადა, რომ შეხვედრაზე პრეზიდენტ ზელენსკის კიდევ ერთხელ დაუდასტურა საფრანგეთის მტკიცე მტკიცე გადაწყვეტილება, მხარი დაუჭირონ უკრაინასა და უკრაინელ ხალხს.
“ვინაიდან რუსეთი სიტუაციის ესკალაციას მიმართავს, უაღრესად მნიშვნელოვანია, რომ ერთობლივად უზრუნველვყოთ უკრაინა ყველა იმ საჭირო საშუალებით, რაც მას თავის დასაცავად, ასევე მშვიდობიანი მოსახლეობისა და ინფრასტრუქტურის დასაცავად სჭირდება. ასევე კიდევ ერთხელ დავადასტურე ჩვენი მზადყოფნა, განვაგრძოთ უკრაინის მხარდაჭერა მყარი და ხანგრძლივი მშვიდობის მიღწევის გზაზე. საფრანგეთი კვლავაც შეასრულებს თავის ვალდებულებებს”, - აღნიშნა მაკრონმა.
