რუსულმა ძალებმა წუხელ კიევზე სარაკეტო შეტევა განახორციელეს, რის შედეგადაც ქალაქის ერთ-ერთი მეტროსადგური დაზიანდა, - ინფორმაციას უკრაინული მედია კიევის მერზე, ვიტალი კლიჩკოზე დაყრდნობით ავრცელებს.

კლიჩკოს განცხადებით, თავდასხმის შედეგად ერთ-ერთი მეტროსადგური დაზიანდა.

„მტრის თავდასხმის შედეგად, დედაქალაქის მარცხენა სანაპიროზე მდებარე ერთ-ერთი მეტროსადგური დაზიანდა. ასევე, სადგურთან ახლოს, ნამსხვრევები მოხვდა და სავალი და საკონტაქტო ლიანდაგები გახეთქა,” - აღნიშნა კლიჩკომ.

გარდა ამისა, კიევის მერის თქმით, ნამსხვრევები სოლომენსკის რაიონში 25-სართულიანი საცხოვრებელი შენობის პირველ სართულს მოხვდა. დნეპროვსკის რაიონში კი - არასაცხოვრებელ შენობას.

ცნობისთვის, კიევში კვირას, 18 ოქტომბერს, ბალისტიკური რაკეტებით თავდასხმა განხორციელდა. დარტყმები დედაქალაქის რამდენიმე რაიონში დაფიქსირდა. თავდასხმის შედეგად 21 წლის გოგონა დაიღუპა და სამი ადამიანი დაშავდა.