ვოლოდიმირ ზელენსკი ომისა და ევროპული უსაფრთხოების საკითხებზე მოლაპარაკებებისთვის დღეს ნორვეგიას ეწვევა, - ინფორმაციას Reuters-ი ნორვეგიისა და ფინეთის მთავრობებზე დაყრდნობით ავრცელებს.

„პრეზიდენტმა ზელენსკიმ უკრაინისთვის კრიტიკულად მნიშვნელოვან მომენტში ნორვეგიასა და ფინეთს მიმდინარე დიპლომატიური ძალისხმევის ფარგლებში შეხვედრის ორგანიზება სთხოვა“, - განაცხადა ნორვეგიის პრემიერ-მინისტრმა, იონას გარ სტორემ.

უკრაინის პრეზიდენტი ვოლოდიმირ ზელენსკი, ნორვეგიის პრემიერ-მინისტრი იონას გარ სტორე და ფინეთის პრეზიდენტი ალექსანდრ სტუბი ოსლოში შეხვედრის შემდეგ პრესკონფერენციას გამართავენ.

შეხვედრის ჩატარება დაადასტურა ფინეთის პრეზიდენტმა ალექსანდრ სტუბმაც.

ნორვეგიისა და ფინეთის მთავრობებს არ დაუკონკრეტებიათ, მიიღებენ თუ არა დღევანდელ შეხვედრაში მონაწილეობას აშშ-ის ან ევროპული ქვეყნების დელეგაციები.

ცნობისთვის, მანამდე Reuters-მა ინფორმაცია გაავრცელა, რომ აშშ-ის პრეზიდენტის დონალდ ტრამპის სპეციალური წარმომადგენელი სტივ უიტკოფი მიმდინარე კვირაში ნორვეგიას ეწვევა და უკრაინაში მიმდინარე ომის დასრულებასთან დაკავშირებული მოლაპარაკებების მორიგ რაუნდში მიიღებს მონაწილეობას, რომელსაც ვოლოდიმირ ზელენსკი და ევროპელი წარმომადგენლებიც დაესწრებიან.