სტივენ ჰაბარდი, რომელიც რუსეთმა ოთხი წლის წინ ბაიდენის ადმინისტრაციის დროს დააკავა, პრეზიდენტ დონალდ ტრამპის თხოვნით ახლახან გაათავისუფლეს, - ამის შესახებ აშშ-ის პრეზიდენტი დონალდ ტრამპი სოციალურ ქსელში წერს.

დონალდ ტრამპის ცნობით, სტივენ ჰაბარდის გათავისუფლება რუსეთის პრეზიდენტ ვლადიმერ პუტინს გასულ კვირას, სატელეფონო საუბრისას სთხოვა.

„სტივენი უკვე სახლში ბრუნდება და მალე ოჯახთან ერთად იქნება. პრეზიდენტ ტრამპის პატივისცემის ნიშნად აშშ-ს სანაცვლოდ არაფრის გაცემა არ დასჭირდა, რაც რუსეთისთვის უპრეცედენტო შემთხვევაა. ამ გათავისუფლებისთვის არანაირი „გაცვლა“ საჭირო არ გამხდარა. ეს მნიშვნელოვანი დაბრუნება დიდი ხნის წინ, ბაიდენის ადმინისტრაციის დროს უნდა მომხდარიყო, რომელმაც კრემლთან მოლაპარაკებებში ვერანაირ შედეგს ვერ მიაღწია“, - წერს ტრამპი Truth Social-ზე.

ცნობისთვის, მოსკოვში დაკავებული აშშ-ის მოქალაქის სტივენ ჰაბარდის ციხიდან გათავისუფლების შესახებ რუსეთის პრეზიდენტმა ვლადიმერ პუტინმა აშშ-ის პრეზიდენტის სპეციალურ წარმომადგენელთან, სტივ უიტკოფთან შეხვედრაზე გამოაცხადა.

74 წლის სტივენ ჰაბარდს 2024 წელს მოსკოვის სასამართლომ უკრაინის მხარეს დაქირავებული მებრძოლების რაზმის შემადგენლობაში ბრძოლისთვის 6 წლითა და 10 თვით თავისუფლების აღკვეთა მიუსაჯა.