დარწმუნებული ვარ, ევროკომისია გაყინული რუსული აქტივების გამოყენების საკითხს აღარ დაუბრუნდება, - ამის შესახებ ბელგიის პრემიერ-მინისტრმა, ბარტ დე ვევერმა განაცხადა.

ბარტ დე ვევერის განცხადებით, დარწმუნებულია, რომ ევროკომისია უკრაინის ფინანსური საჭიროებების დასაფარად ბელგიის ტერიტორიაზე შენახული გაყინული რუსული აქტივების გამოყენების შესახებ ახალ წინადადებას არ წარადგენს.

„ამაში დარწმუნებული ვარ, რადგან ეს უკვე ითქვა“, - აღნიშნა ბელგიის პრემიერ-მინისტრმა.

ცნობისთვის, ბელგიის ტერიტორიაზე დაახლოებით 189 მილიარდი ევროს ოდენობის გაყინული რუსული აქტივები ინახება. გასულ წელს, ბელგიამ გაყინული აქტივების გამოყენებით უკრაინის დაფინანსების გეგმას მხარი არ დაუჭირა, რის შემდეგაც ევროკავშირის ლიდერები უკრაინისთვის 90 მილიარდი ევროს ოდენობის სესხის პაკეტზე შეთანხმდნენ.