ისრაელის ცესკო ხმების სრულად დათვლის შემდეგ - ბენიამინ ნეთანიაჰუს ბლოკს 53 მანდატი აქვს, გადი აიზენკოტის ბლოკს - 48, არაბულ პარტიებს - 19

ისრაელის ცენტრალურმა საარჩევნო კომისიამ საპარლამენტო არჩევნების საბოლოო შედეგები გამოაქვეყნა, - ინფორმაციას The Times of Israel-ი ავრცელებს.

ამ შედეგების მიხედვით, პრემიერ-მინისტრ ბენიამინ ნეთანიაჰუს ბლოკს 53 მანდატი აქვს, გადი აიზენკოტის ბლოკს - 49-ს, არაბულ ფრაქციებს კი - 19. აღსანიშნავია, რომ ნეთანიაჰუს მომხრე ბლოკში შემავალ პარტიებს, რომლებიც ამჟამინდელ მთავრობას ქმნიან, მოქმედ ქნესეთში 68 მანდატი ჰქონდათ.

სრული ოფიციალური შედეგები პრეზიდენტ ისააკ ჰერცოგს ოთხშაბათს წარედგინება - მას შემდეგ, რაც ცენტრალური საარჩევნო კომისია დაასრულებს ხარვეზებთან ან საჩივრებთან დაკავშირებულ საბოლოო მოკვლევებს. ამის შემდეგ, ჰერცოგი შეხვდება თითოეული პარტიის ლიდერს, რომლებიც მას წარუდგენენ თავიანთ რეკომენდაციას იმ კანდიდატის შესახებ, რომელმაც, მათი აზრით, მომავალი მთავრობა უნდა ჩამოაყალიბოს. ჰერცოგმა პარტიების ლიდერებს მოუწოდა, ყველაფერი გააკეთონ არჩევნების კიდევ ერთი რაუნდის თავიდან ასაცილებლად.

„ყველაფერი უნდა გავაკეთოთ, რათა თავიდან ავიცილოთ არჩევნების კიდევ ერთი რაუნდი. ამიტომ, ველოდები, რომ ყველა, ვინც აქ მოვა, მზად იქნება კონსტრუქციული დიალოგისთვის“, - განაცხადა ჰერცოგმა.