ზუგდიდში 560 ადამიანის სია იყო, შესაბამისად, 560-ვე გავშიფრეთ. ერთიც კი არ არის ადამიანი, რომელიც არაა „ქართულ ოცნებასთან“ დაკავშირებული, ან „ქართული ოცნების“ წევრი არ არის. ეს დანაშაულია, რომლის სათავეშიც საოლქოს თავმჯდომარე, მირანდა მესხი დგას, ის თავის მხრივ, სახელმწიფო უსაფრთხოების სამსახურისგან უშუალო დავალებებს იღებს, - ამის შესახებ „ერთიანობა - ნაციონალური მოძრაობის“ ზუგდიდის ორგანიზაციის თავმჯდომარემ, ანა წითლიძემ განაცხადა.

როგორც ის განმარტავს, ზუგდიდის საოლქო-საარჩევნო კომისიის სხდომაზე, სადაც საუბნო-საარჩევნო კომისიების წევრები უნდა დაემტკიცებინათ, „ერთიანობა ნაციონალური მოძრაობის“ ზუგდიდის ორგანიზაციის თავმჯდომარემ, ანა წითლიძემ საოლქო კომისიის თავმჯდომარეს, მირანდა მესხს მიმართა და აღნიშნა, რომ ის პირები, რომლებიც საუბნო კომისიებში ინიშნებიან, პარტიული ნიშნით არიან შერჩეულები.

ანა წითლიძის განცხადებით, ისინი „ქართული ოცნების“ დავალების შემსრულებლები არიან და შესაბამისად, არც თავისუფალი და არც დემოკრატიული არჩევნების ნაწილი არ არიან.

„კანონის მიხედვით, ისინი თავისუფალი უნდა იყვნენ ნებისმიერი პარტიის გავლენისაგან, მაგრამ საოლქო-საარჩევნო კომისიამ კიდევ ერთხელ დაგვანახა, რომ ისინი ამ ქვეყანაში თავისუფალი არჩევნების ჩატარებას არ აპირებენ. ეს არის დანაშაული, რომელიც სათავეს საოლქოს თავმჯდომარის, მირანდა მესხისგან იღებს, რომელიც, თავის მხრივ, სახელმწიფო უსაფრთხოების სამსახურისგან უშუალო დავალებებს იღებს“, - განაცხადა წითლიძემ, რომლის კომენტარსაც „ერთიანობა - ნაციონალური მოძრაობა“ ავრცელებს.

მათივე ინფორმაციით, ზუგდიდის საოლქო-საარჩევნო კომისიის სხდომაზე საუბნო კომისიების წევრთა დამტკიცება პირველი კენჭისყრით ვერ მოხერხდა, რადგან სიას მხარი ოპოზიციის წარმომადგენლებმა არ დაუჭირეს, მაგრამ მეორე კენჭისყრით საუბნო კომისიის 560-ვე წევრი დაამტკიცეს.

შეგახსენებთ, დღეს ყველა რეგიონში საოლქო-საარჩევნო კომისიების სხდომა იყო ჩანიშნული, სადაც საუბნო-საარჩევნო კომისიის წევრები დაამტკიცეს.

ოპოზიცია აცხადებს, რომ საუბნო-საარჩევნო კომისიის წევრები არა პროფესიული, არამედ პარტიული ნიშნით შეირჩა და ისინი "ქართული ოცნების" ინტერესებს გაატარებენ.