ევროკავშირისა და გაერო-ს განვითარების პროგრამის ინიციატივით მიკრო კრედიტების გაცემა იწყება
ევროკავშირისა და გაერო-ს განვითარების პროგრამის (UNPD) ინიციატივით შიდა ქართლში, სამეგრელო-ზემო სვანეთსა და მცხეთა-მთიანეთში მიკრო კრედიტების გაცემა იწყება.
საქართველოში გაერო-ს განვითარების პროგრამის წარმომადგენლობის ვებ გვერდის ცნობით, მომავალი ერთი წლის მანძილზე საფინანსო ინსტიტუტები გასცემენ მიკრო სესხებს 3 ათას აშშ დოლარამდე, სოფლის მეურნეობის, ვაჭრობისა და მომსახურების სექტორებში.
გაერო-ს განვითარების პროგრამასთან შეთანხმების საფუძველზე, სესხის მიღებისას უპირატესობა მიენიჭება მცირე ფერმერებს, ქალებს, დამწყებ ბიზნესმენებსა და იძულებით გადაადგილებულ პირებს. თავის მხრივ, გაერო-ს განვითარების პროგრამა საკონსულტაციო დახმარებას გაუწევს მსესხებლებს როგორც სესხის აღებამდე, ასევე სესხის აღების შემდეგ.
პროექტში მონაწილეობისთვის გაერო-ს განვითარების პროგრამამ (UNPD) ექვსი მიკრო საფინანსო ინსტიტუტი – ლაზიკა კაპიტალი, ალიანს გრუპი, კრედო, კრისტალი, ფინაგრო და ფინკა, და ერთი ბანკი – კონსტანტა, შეარჩია. შერჩევის საფუძველს ამ ინსტიტუტების გამოცდილება, სესხების სპეციფიკა და საერთაშორისო რეპუტაცია წარმოადგენდა.
ხელშეკრულება საფინანსო ინსტიტუტებთან დღეს თბილისში გაერო-ს სახლში გაფორმდა. ხელშეკრულების მიხედვით თითოეულმა საფინანსო ინსტიტუტმა დაფინანსების პირველი ტრანში მიიღო, რომელიც 99 ათას აშშ დოლარს შეადგენს. პროექტის მთლიანი ღირებულება კი დაახლოებით 2.6 მილიონი აშშ დოლარია.
გაერო-ს განვითარების პროგრამის ეს ინიციატივა ევროკავშირის ხელშეწყობით ხორციელდება და გასული წლის აგვისტოში საომარი მოქმედებების შედეგად დაზარალებული რეგიონების დახმარების ნაწილს წარმოადგენს. ინიციატივის სრული ღირებულება 4.4 მილიონ ევროს შეადგენს.; მისი სამი კომპონენტი პროფესიული განათლების განვითარებას, მიკროფინანსირებასა და ინფრასტრუქტურის აღდგენას მოიცავს.
v-if="article.gallery" v-html="article.gallery"
