თბილისის მე-10 საერთაშორისო კინოფესტივალი ხვალ გაიხსნება

თბილისის მე-10 საერთაშორისო კინოფესტივალი ხვალ გაიხსნება.

ფესტივალი საზეიმოდ კინოთეატრ “ამირანში” გაიხსნება და ნაჩვენები იქნება რეჟისორ ლევან კოღუაშვილის ახალი ფილმი - “ქუჩის დღეები”. ფილმისთვის სცენარი ლევან კოღუაშვილს, ბორის ფრუმინსა და ნიკოლოზ მარის ეკუთვნის, ოპერატორია არჩილ ახვლედიანი. მონაწილეობენ: გუგა კოტეტიშვილი, თემო გოგიძე, ლევან ჯივიძე, ზურა ბეგალიშვილი, ალეკო ბეგალიშვილი, ზურა შარია.

ფილმის მთავარი გმირი, 45 წლის თბილისელი ნარკომანი, თავისი ცხოვრების ყველაზე მნიშვნელოვანი არჩევანის წინაშე დგას: კორუმპირებული პოლიციელები მისგან მეგობრის შვილის – 16 წლის ბიჭის დაბეზღებას ითხოვენ. თუ დათანხმდება, წამლით და ფულით დაასაჩუქრებენ, ხოლო თუ უარს იტყვის, 10 წლით გაუშვებენ ციხეში და ამით მისი ცხოვრება პრაქტიკულად დასრულდება. ფილმის მთავარი გმირი პოლიციელების წინადადებაზე თანხმდება და მეგობრის შვილის გასაწირად მიდის, თუმცა ბოლო წუთს მასში ღირსება იღვიძებს.

ფესტივალის გახსნამდე, კინოთეატრ ~ამირანში~ ფრანგი ფოტოგრაფის კატრინ ვინეს ნამუშევრების გამოფენა გაიმართება.

ფესტივალი საზეიმოდ 6 დეკემბერს მაიკ ლის გახმაურებული სურათით “ვერა დრეიკით” დაიხურება.

კინოფესტივალის პროგრამით გათვალისწინებულია 100-მდე მხატვრული, მოკლემეტრაჟიანი და დოკუმენტური ფილმის ჩვენება 19 ქვეყნიდან.