თბილისის №47-ე საჯარო სკოლის მოსწავლეებს ამიერიდან სპორტის გაკვეთილები განახლებულ სპორტულ დარბაზში ჩაუტარდებათ.

რეაბილიტირებული სპორტული დარბაზი დღეს საქართველოს განათლებისა და მეცნიერების მინისტრის პირველმა მოადგილე კოკა სეფერთელაძემ დაათვალიერა. სტუმარი 47-ე სკოლის კალათბურთის შიდა ჩემპიონატის ფინალურ შეხვედრასაც დაესწრო.

სპორტის გაკვეთილების დანერგვის შემდეგ, საჯარო სკოლებში ოცდაოთხი სპორტული ლიგა შეიქმნა, მოსწავლეები ერთმანეთს სპორტის ამდენივე სახეობაში ეჯიბრებიან.

47-ე საჯარო სკოლაში ფეხბურთის, კალათბურთის, ფრენბურთისა და ორთაბრძოლების გაკვეთილები ტარდება, ეწყობა შეჯიბრებებიც.

ამჯერად, კალათბურთში შეჯიბრი უფროსკლასელებს შორის ჩატარდა, ფინალურ შეხვედრაში ერთმანეთს XI და XII კლასელთა გუნდები ხვდებოდნენ. გამარჯვებულ გუნდს ჩემპიონის თასი, ხოლო მოთამაშეებს სიგელები გადაეცათ.

47-ე საჯარო სკოლის სპორტული დარბაზის რეაბილიტაცია სამინისტროს საგანმანათლებლო და სამეცნიერო ინფრასტრუქტურის განვითარების სააგენტომ განახორციელა. გასულ წელლს, თბილისის მასშტაბით, 30 საჯარო სკოლაში ახალი სპორტული მოედანი გაკეთდა, 70 სკოლაში სპორტული დარბაზი მოეწყო.

რეაბილიტირებული სასკოლო სპორტული ინფრასტრუქტურა თანამედროვე სტანდარტებს სრულად აკმაყოფილებს და მოზარდების სპორტის სხვადასხვა სახეობებში კომპლექსურად მომზადების საშუალებას იძლევა.