თსუ-ს ესტონეთის ელჩი ეწვევა
ივანე ჯავახიშვილის სახელობის თბილისის სახელმწიფო უნივერსიტეტს დღეს საქართველოში ესტონეთის ელჩი ტომას ლუკი ეწვევა. ელჩი გაცვლით პროგრამებში მონაწილე ქართველ და ესტონელ სტუდენტებს შეხვდება. შეხვედრაზე საუბარი სამომავლო გეგმებსა და მათ განხორციელებას შეეხება; თავად გაცვლითი პროგრამის მონაწილე სტუდენტები ერთმანეთს გამოცდილებას გაუზიარებენ, ხოლო პროგრამაში ჩართვის მსურველებს საჭირო ინფორმაციას მიაწვდიან. ღონისძიებას თსუ-ის რექტორი ალექსანდრე კვიტაშვილი, ესტონეთის კონსული საქართველოში, საელჩოსა და თსუ-ის წარმომადგენლები დაესწრებიან.
თსუ-სა და ევროპის სხვადასხვა უმაღლეს სასწავლებლებს შორის არსებული გაცვლითი პროგრამების ფარგლებში უცხოეთის სხვადასხვა უნივერსიტეტებში 62 სტუდენტი გაიგზავნა სასწავლებლად, ხოლო თბილისში 71 უცხოელი სტუდენტი ჩამოვიდა. ჯავახიშვილის სახელობის უნივერსიტეტის ყველაზე დიდი პარტნიორი ტარტუს (ესტონეთი) უნივერსიტეტია.
თსუ-სა და ტარტუს უნივერსიტეტს შორის კულტურულ-საგანმანათლებლო გაცვლითი პროგრამების განხორციელებაზე ხელშეკრულება 2006 წელს გაფორმდა. ამ ხნის განმავლობაში ტარტუს უნივერსიტეტში 23 ქართველი სტუდენტი გაიგზავნა სასწავლებლად, ხოლო თსუ-ში _ 17 სტუდენტი ჩამოვიდა ტარტუს უნივერსიტეტიდან.
v-if="article.gallery" v-html="article.gallery"
