2011 წლის ერთიანი ეროვნული გამოცდებისათვის აბიტურიენტთა ბაზის ფორმირება დასრულდა
გამოცდების ეროვნულმა ცენტრმა აბიტურიენტთა რეგისტრაციის შედეგები ვებგვერდზე (www.naec.ge) გამოაქვეყნა.
.როგორც ”ინტერპრესნიუსს” გამოცდების ეროვნული ცენტრიდან აცნობეს, 2011 წელს ეროვნულ გამოცდებში მონაწილეობის მისაღებად 35 ათასამდე აბიტურიენტი დარეგისტრირდა.
აბიტურიენტების უმეტესობამ პირველ არჩევნად ივანე ჯავახიშვილის სახელობის თბილისის სახელმწიფო უნივერსიტეტის, ილიას უნივერსიტეტისა და საქართველოს ტექნიკური უნივერსიტეტის ფაკულტეტები მიუთითა. 7–ვე არჩევანის გათვალისწინებით, განაცხადების ყველაზე მეტი რაოდენობით ტექნიკური უნივერსიტეტი ლიდერობს, მეორე ადგილზეა ილიას უნივერსიტეტი, მესამეზე – ივანე ჯავახიშვილის სახელობის თბილისის სახელმწიფო უნივერსიტეტი.
პირველი არჩევანის მიხედვით ლიდერობენ ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა, ჰუმანიტარულ მეცნიერებათა ფაკულტეტები. წელს პირველად, პირველი არჩევანის მიხედვით, ათეულში მოხვდა ზუსტი და საბუნებისმეტყველო მეცნიერებების ფაკულტეტი.
კონკურსი (განაცხადების რაოდენობა 1 ადგილზე) ყველაზე მაღალი აღმოჩნდა თავდაცვის ეროვნულ აკადემიის, სამედიცინო უნივერსიტეტის, ილიას უნივერსიტეტისა და თავისუფალი უნივერსიტეტის ფაკულტეტებზე.
v-if="article.gallery" v-html="article.gallery"
