კოჯრის შესასვლელში იუნკერთა მემორიალის რეკონსტრუირებაზე 30 ათას ლარამდე თანხა დაიხარჯა.

კოჯრის შესასვლელში იუნკერთა რეკონსტრუირებული მემორიალი დღეს თბილისის საკრებულოს თავმჯდომარის პირველმა მოადგილემ მამუკა ახვლედიანმა და დიდგორის რაიონის გამგებელმა გოგიტა ნიკოლაძემ გახსნეს.

90-იან წლების დასაწყისში იუნკერთა ხსნოვნის პატივსაცემად აგებული მემორიალის რეკონსტრუქცია თბილისის დიდგორის რაიონის გამგეობამ განახორციელა.

პროექტის ფარგლებში მოხდა მიმდებარე ტერიტორიის გაფართოება და კეთილმოწყობა. გაკეთდა გარე განათება, დაირგო სხვადასხვა სახეობის დეკორატიული ხე-მცენარეები და მოეწყო დასასვენებელი ადგილი.

1921 წლის თებერვალში საბჭოთა რუსეთის მე-11 არმიამ საქართველოს ანექსია მოახდინა. ქართველი იუნკერებმა მტერს თბილისის მისადგომებთან, ტაბახმელა-კოჯორში წინააღმდეგობა გაუწიეს. 1921 წლის 24 თებერვალს იუნკერთა დიდი ნაწილი გმირულად დაეცა ბრძოლის ველზე.