საქართველოში ბებია ქალის ინსტიტუტის განვითარებას და საერთაშორისო სტანდარტებთან მიახლოებას სამეცნიერო კონფერენცია მიეძღვნა.

სასტუმრო ~ჰოლიდეი ინ~-ში, ასოციაცია ~ჰერა XXI~-ის ორგანიზებით, დღეს დასკვნითი კონფერენცია გაიმართა. მას საქართველოში მოღვაწე წამყვანი გინეკოლოგები, მეცნიერები, ბებია ქალები და საერთაშორისო დონორი ორგანიზაციების წარმომადგენლები ესწრებოდნენ.

ასოციაცია ~ჰერა XXI~-ის აღმასრულებელი დირექტორის, ნინო წულეისკირის განცხადებით, საქართველოში არსებულ სამშობიარო სახლებსა თუ სხვა სამედიცინო დაწესებულებებში 800 ბებია ქალი მუშაობს. ისინი უმაღლესი კვალიფიკაციის სამედიცინო მუშაკები არიან, თუმცა, საერთაშორისო სამედიცინო სტანდარტების მისაღწევად მათი გადამზადება აუცილებელია.

ნინო წულეისკირის ინფორმაციით, თბილისის სახელმწიფო სამედიცინო უნივერსიტეტში შარშან ბებია ქალის ფაკულტეტი გაიხსნა, რაც საშუალებას იძლევა ქვეყანაში უმაღლესი განათლების მქონე და საერთაშორისო სამედიცინო სტანდარტების უნარ-ჩვევებით მომზადებულმა სამედიცინო მუშაკებმა მიიღონ ბებია ქალისთვის საჭირო თანამედროვე სტანდარტების განათლება.

კონფერენციას ჯანდაცვის საპარლამენტო კომიტეტის თავმჯდომარე ოთარ თოიძე დაესწრო. მისი თქმით, აუცილებელია ბებია ქალის ინსტიტუტი განვითარდეს, ვინაიდან როგორც ამერიკის შეერთებული შტატების და სხვა განვითარებული ქვეყნების გამოცდილება აჩვენებს, პროფესიონალი და შესაბამისი ფსიქოლოგიურ განათლებამიღებული ბებია ქალი ხშირად გადამწყვეტ როლს თამაშობს მშობიარობისა და ჩვილის გადარჩენის საკითხებში.