"ცენტრ-პოინტის" მიერ დაზარალებულებმა პარლამენტის შენობის წინ ე.წ. ხაჭოს აქცია გამართეს. როგორც "ინტერპრესნიუსის" კორესპონდენტი საკანონმდებლო ორგანოს მიმდებარე ტერიტორიიდან იუწყება, "ცენტრ-პოინტის" მიერ დაზარალებულებმა პარლამენტის შენობასთან ვიცე-სპიკერ რუსუდან კერვალიშვილს ხაჭო მიუტანეს.

როგორც დაზარალებულები ამბობენ, 7 თებერვალს გამართულ შეხვედრაზე კერვალიშვილმა მათ უთხრა, რომ დაზარალებულებს ვერაფრით დაეხმარება, რადგან ხაჭოს ფულიც კი არ აქვს. ამიტომ "ცენტრ-პოინტის" ყოფილმა კლიენტებმა რუსუდან კერვალიშვილს ხაჭო მიუტანეს.

გარდა ამისა, "ცენტრ-პოინტის" მიერ დაზარალებულები აგროვებენ ხელმოწერას, რომელსაც პროკურატურას წარუდგენენ იმ თაღლითურ სქემასთან დაკავშირებით, რომელიც, როგორც თავად აცხადებენ, "ცენტრ-პოინტისა" და "დექსუსის" მიერ ხორციელდება.

ასევე , დაზარალებულები მოითხოვენ, რომ რუსუდან კერვალიშვილმა, ასევე მისმა დამ მაია რჩეულიშვილმა და სიძემ ვახტანგ რჩეულიშვილმა მთელ თავის ქონებაზე თქვან უარი იმისთვის, რომ "დექსუსმა" შეძლოს ბინების მშენებლობის დასრულება და მათთვის გადაცემა.

პარლამენტის შენობასთან დაახლოებით 100-მდე ადამიანი იყო შეკრებილი.