"მენაშენეთა ასოციაციის" წარმომადგენლები პრეზიდენტის რეზიდენციასთან საპროტესტო აქციას მართავენ და მიხეილ სააკაშვილს მათი პრობლემების მოგვარებას სთხოვენ.

როგორც "ინტერპრესნიუსს" "მენაშენეთა ასოციაციის" ხელმძღვანელმა თემურ ფიფიამ განაცხადა, "ცენტრ პოინტისა" და "დექსუსისგან" 25 000 ადამიანია დაზარალებული, რომლებიც კომპანიების მიერ ხელშეკრულების დარღვევის გამო, ფაქტობრივად, ქუჩაში არიან დარჩენილები.

"კერვალიშვილების ქონება მთლიანად ეყოფა დაზარალებულებს, რათა დაწყებული მშენებლობები დასრულდეს და ქუჩაში დარჩენილი მოქალაქეები ამ შენობებში შესახლდნენ. ჩვენ პრეზიდენტს ვთხოვთ, ჩაერიოს ამ საქმეში და გვერდში დაგვიდგეს", - განაცხადა თემურ ფიფიამ.

საპროტესტო აქციაზე "დექსუსისა" და "ცენტრ პიონტისგან" დაზარალებულმა მოქალაქეებმა ტრანსფარატები და პლაკატები მოიტანეს. ერთ-ერთმა მოქალაქემ რუსუდან კერვალიშვილის მისამართით მკვეთრი განცხადებებიც გააკეთა, შემდგომ მის ფოტოს წიხლი ჰკრა და მიაფურთხა. მენაშენეთა განცხადებით, რუსუდან კერვალიშვილი სვანეთში აპირებს კენჭისყრას.

"თბილისი ხომ ააშენა და ახლა სვანეთის აშენებას აპირებს. სვანები არ მოტყუვდებიან და ამ თაღლით ქალს ხმას არ მისცემენ", - განაცხადეს აქციის მონაწილეებმა.

მათი თქმით, აქციები გაგრძელდება იმ დრომდე, სანამ საქმეში საქართველოს ხელისუფლება და პრეზიდენტი არ ჩაერევა, დამნაშავეებს არ დასჯის და დაზარალებულები არ მიიღებენ კუთვნილს.