GWP - წუხანდელ წყალდიდობას თბილისის სასმელი წყლის ხარისხზე გავლენა არ მოუხდენია
კომპანია "ჯორჯიან უოთერ ენდ ფაუერი" წუხანდელ წყალდიდობებთან დაკავშირებით სპეციალურ განცხადებას ავრცელებს .
როგორც განცხადებაშია ნათქვამი, წუხანდელმა გადაუღებელმა წვიმებმა და ნიაღვრებმა, მდინარე არაგვის და მისი შენაერთების ადიდება გამოიწვია, რამაც GWP-ის არაგვის ხეობაში განთავსებული სათავე ნაგებობების ფუნქციონირებას პრობლემები შეუქმნა.
"აღნიშნულის გამო, თბილისის გარკვეული უბნების წყალმომარაგებაში შეზღუდვებია შექმნილი. ამჟამად წყლის მიწოდება შეზღუდვით ხორციელდება: ვაკე-საბურთალოს, მთაწმინდა-სოლოლაკის, ნაძალადევის, ჩუღურეთის ზედა ზონებში, სვანეთის უბანსა და სანზონაში. შექმნილ მდგომარეობას არანაირი გავლენა არ მოუხდენია თბილისის მოსახლეობისთვის მიწოდებული სასმელი წყლის ხარისხზე. თბილისისთვის მიწოდებული წყლის ხარისხი სრულად შეესაბამება სახელმწიფო სტანდარტებს. თბილისის წყალმომარაგებაში შექმნილი დეფიციტის აღმოსაფხვრელად GWP სამუშაოებს ახლაც უწყვეტ რეჟიმში ახორციელებს", - ნათქვამია კომპანიის განცხადებაში.
v-if="article.gallery" v-html="article.gallery"
