იუსტიციის სამინისტროსთან "ცენტრ-პოინტის" მიერ დაზარალებულ მენაშენეთა აქცია მიმდინარეობს.

როგორც "ინტერპრესნიუსის" კორესპონდენტი იუწყება, აქციის მონაწილები იუსტიციის მინისტრისგან ობიექტური გამოძიების ჩატარებას და "ცენტრ-პოინტის" დამფუძნებლების პასუხისმგებებაში მიცემას მოითხოვენ. აქციის მონაწილეებთან დღეს პარლამენტარი დიმიტრი ლორთქიფანიძე და "ქართული ოცნების" წარმომადგენელი ლაშა ჩხარტიშვილი მივიდნენ.

პარლამენტარის თქმით, ხელისუფლება შეგნებულად არ ახდენს რეაგირებას და არ იწყებს გამოძიებას ლაშა ჩხარტიშვილის აზრით კი, რომ არა ხელისუფლების ნება, ეს ხალხი ფინანსური პირამიდის მსხვერპლი არ გახდებოდა. მისივე თქმით, ამ აქციას შედეგი შეიძლება დღეს არ მოჰყვეს, თუმცა შედეგი აუცილებლად ექნება შემოდგომაზე, არჩევნების დროს, რადგან ხალხი ასეთ ხელისუფლებას მხარს აღარ დაუჭერს.

დაზარალებულები ტელეკომპანია "რეალ-ტივის" ოფისისკენ მსვლელობის დაწყებას გეგმავენ. ისინი ტელეარხის იმ გადაცემას აპროტესტებენ, რომლის მიხედვითაც, "დექსუსმა" "ცენტრ-პოინტისგან" გადაბარებული ვალდებულებები სრულყოფილად შეასრულა.

აქციის მონაწილეები ამ გადაცემას არაობიექტურს უწოდებენ და აცხადებენ, რომ "დექსუსს" ვალდებულებები ნაწილობრივადაც კი არ შეუსრულებია.