"ცენტრ-პოინტის" მიერ დაზარალებულთა აქცია ტელეკომპანია "რეალ-ტივის" წინ გაგრძელდა. აქციის მონაწილეებთან

 "რეალ-ტივის" საინფორმაციო სამსახურის უფროსი სოფო ხუციშვილი და ჟურნალისტი მაია თევზაძე გამოვიდნენ. მათი განმარტებით, "დექსუსთან" დაკავშირებით გადაცემა არ იყო საინფორმაციო ფორმატის და ის სარეკლამო ფორმატით გავიდა.

მათივე განმარტებით, საინფორმაციო გადაცემაში დაზარალებულთა შესახებ ადრე არაერთი სიუჟეტი გასულა. ამის შემდეგ "რეალ-ტივის" თანამშრომლებმა აქციის მონაწილეებთან ჩაწერეს ინტერვიუები და განაცხადეს, რომ სიუჟეტი საინფორმაციო გამოშვებებში გავა.

აქციაზე შელაპარაკება მოხდა "ქართული ოცნების" წევრ ლაშა ჩხარტიშვილსა და "რეალ-ტივის" საინფორმაციო სამსახურის უფროსს შორის. კამათი ჩხარტიშვილის რეპლიკას მოჰყვა, რომ "რეალ-ტივი" არაობიექტური და მკვლელების საკუთრებაში არსებული ტელევიზიაა. რეპლიკის პასუხად, სოფო ხუციშვილმა ჩხარტიშვილს განუცხადა, რომ ამ ხალხს ბიძინა ივანიშვილი იყენებს.

აქციის მონაწილეები ტელეარხის იმ გადაცემას აპროტესტებენ, რომლის მიხედვითაც, "დექსუსმა" "ცენტრ-პოინტისგან" გადაბარებული ვალდებულები სრულყოფილად შეასრულა.