კომპანია "ცენტრ პოინტის" მიერ დაზარალებულმა მოქალაქეებმა მთავრობის კანცელარიასთან საპროტესტო აქცია გამართეს და პრობლემების მოგვარება პრემიერ-მინისტრ ვანო მერაბიშვილს სთხოვეს.

როგორც "ინტერპრესნიუსს" აქციის ერთ-ერთმა მონაწილე მარინა კორძაძემ განუცხადა, კომპანია "ცენტრ პოინტის" მიერ 2600 ადამიანია დაზარალებული, თუმცა აღნიშნულ სამშენებლო კომპანიას მითვისებული 310 მილიონი დოლარის გამო პასუხს არავინ სთხოვს.

"ახლად დანიშნულ პრემიერ-მინისტრ ვანო მერაბიშვილს ჩვენ პრობლემებში გარკვევას და დახმარებას ვთხოვთ. დამნაშავეები უნდა დაისაჯონ და ჩვენ კუთვნილი მივიღოთ. მერაბიშვილს ვთხოვთ "ცენტრ პოინტის" მემკვიდრე "დექსუსი" მოგვაშოროს, რომელიც ულტიმატუმის ენით გველაპარაკება", - განაცხადა მარინა კორზაძემ.

აქციის მონაწილეებმა ვანო მერაბიშვილის სახელზე მიმართვის ტექსტი შეადგილეს, სადაც აღნიშნულია, რომ სისხლის სამართლის საქმე პარლამენტარ რუსუდან კერვალიშვილის, მაია და ვახტანგ რჩეულიშვილების მიმართ უნდა აღიძრას.

მენაშენეთა აქციას სოლიდარობა პარლამენტარმა დიმიტრი ლორთქიფანიძემ გამოუცხადა.