ტელეკომპანია "მაესტროს" კუთვნილი სატელიტური ანტენების დაყადაღება მედიაორგანიზაციების წარმომადგენლებმა დღეს პრეზიდენტის რეზიდენციასთან გააპროტესტეს.

რამდენიმე მედიაორგანიზაციის წარმომადგენელმა პრეზიდენტის რეზიდენციასთან მიიტანეს სატელიტური თეფში, რომელზეც "მაესტროს" მხარდამჭერთა ხელმოწერებია.

გარდა ამისა, აქციის მონაწილეებმა პრეზიდენტს რეზიდენციაში დაუტოვეს სპეციალური წერილი და მიმართვა, რომელშიც ითხოვენ, რომ დაყადაღებული ანტენები კანონიერ მფლობელს, ტელეკომპანია "მაესტროს" უკან დაუბრუნდეს.

დღევანდელ აქციაში მონაწილეობდნენ ტელეკომპანია "მაესტროს" გენერალური დირექტორი ბაჩო კიკაბიძე, ტელეკომპანია "კავკასიის" საინფორმაციო სამსახურის უფროსი ნინო ჯანგირაშვილი, გაზეთ "რეზონანსის" მთავარი რედაქტორი ლაშა ტუღუში და მედიაექსპერტი და ჟურნალისტი ზვიად ქორიძე.

როგორც აქციის მონაწილეები აცხადებენ, საზოგადოებისთვის კარგად არის ცნობილი, რომ ხელისუფლებამ წითელი ხაზი გადაკვეთა და უხეშად შეეხო მედიას. მათი თქმით, უკანონო გადაწყვეტილება "მაესტროს" სატელიტური ანტენების დაყადაღების შესახებ არღვევს როგორც "მაესტროს", ასევე საზოგადოების ფუნდამენტურ უფლებას, რომ ჰქონდეს სიტყვის თავისუფლება, მიიღოს და გაავრცელოს მიუკერძოებელი ინფორმაცია.

როგორც აქციის ორგანიზატორები აცხადებენ, "მაესტროს" მხარდამჭერი კამპანიის ფარგლებში მომდევნო საპროტესტო აქცია, სახელწოდებით - ”დავაყადაღოთ პროკურატურა” საქართველოს მთავარი პროკურატურის შენობასთან 3 აგვისტოს გაიმართება.