დღეს, სავარაუდოდ, თბილისში მიკროავტობუსის მძღოლების გაფიცვა შეწყდება.  როგორც გლდანის ავტოპარკთან გაფიცულების საინიციატივო ჯგუფის წევრები აცხადებენ , ყველა ავტოპარკი თანახმაა იმ პირობებზე, რომელიც გუშინ ღამით მათთან შეხვედრისას "თბილისის მიკროავტობუსის" წარმომადგენლებმა გააცნეს. გლდანის ავტოპარკთან მყოფი მძღოლები აღნიშნავენ, რომ იმ შემთხვევაში, თუ არ ასრულდება "თბილისის მიკროავტობუსის" დაპირებები, ისინი მარტიდან გააგრძელებენ გაფიცვას. მძღოლები "თბილისის მიკროავტობუსისგან" ითხოვენ დოკუმენტს, რომელშიც აღნიშნული იქნება, რომ დაპირებები შესრულდება. 

მძღოლების განცხადებით, "თბილისის მიკროავტობუსის" დაპირების მიხედვით, ჩატარდება მონიტორინგი და მარტიდან განისაზღვრება ყოველდღიური გეგმის ახალი ოდენობა. ასევე, თებერვალში მათ 25%-ით ნაკლები გადასახადის გადახდა მოუწევთ. მათივე ცნობით, "თბილისის მიკროავტობუსი" ინდმეწარმის სტატუსთან დაკავშირებით თანხმდება მერიის კანონპროექტს, რომლის მიხედვითაც, გადასახადი ინდმეწარმეობასთან დაკავშირებით 10 ლარი იქნება. პროფილაქტიკასთან დაკავშირებით მხარეებს უკვე მიღწეული აქვთ შეთანხმება.

მძღოლები უკვე 7 დღეა გაფიცულები არიან.