უკრაინელი ხალხის მხარდასაჭერად ბათუმში აქცია გაიმართა. ბათუმის შოთა რუსთაველის სახელმწიფო უნივერსიტეტის სტუდენტები ევროპის მოედანზე შეიკრიბნენ , უკრაინისა და საქართველოს დროშები გამოფინეს, ასევე, ტრანსფარანტებზე წარწერები გააკეთეს - "ევროპა ჩვენი სახლია".

როგორც აქციის ორგანიზატორმა თომა ხალვაშმა აღნიშნა, საპროტესტო აქციაზე მყოფ უკრაინის მოსახლეობას მხარს უჭერს მათი პროევროპული მიზნებიდან გამომდინარე.

"აქციის მიზანია უკრაინელ ხალხს გამოვუცხადოთ სოლიდარობა მათი პროევროპული მიზნების მხარდასაჭერად. ვფიქრობთ, ეს არის აუცილებლობა იმ მარტივი მიზეზიდან გამომდინარე, რომ კითხვა, თუ ვინ იქნება შემდეგი, მარტივად შეიძლება ვიგულისხმოთ საქართველო, რადგან რუსეთს აქვს ბერკეტები, რომელიც შეიძლება საქართველოს საწინააღმდეგოდ გამოიყენოს", - აღნიშნა თომა ხალვაშმა.

აქციის მონაწილე დავით ხაჯიშვილი უკრაინელი ოპოზიციონერების და მოსახლეობის პროტესტს უერთდება. მან უკრაინულ ენაზე უკრაინელ მოსახლეობას მხარდამჭერი მესიჯი გაუგზავნა.

"ბათუმელი ახალგაზრდები მხარდაჭერას გიცხადებთ, რადგან ევროპა არის უკრაინისთვის სახლი, ისევე როგორც საქართველოსთვის", - აღნიშნა დავით ხაჯიშვილმა.

აქციაზე "ერთიანი ნაციონალური მოძრაობის" წევრებიც იმყოფებოდნენ.