საბურთალოს გამგეობა ამხანაგობების თავმჯდომარეების სემინარისთვის 45 999 ლარს დახარჯავს
საბურთალოს რაიონის გამგეობა ამხანაგობების თავმჯდომარეებისთვის სემინარის ორგანიზებისთვის 45 999 ლარს დახარჯავს.
ამხანაგობების თავმჯდომარეებისთვის სამდღიანი ტრენინგ-სემინარი ბაკურიანში გაიმართება და მასში მონაწილეობას 140 პირი მიიღებს.
კონკურენციისა და სახელმწიფო შესყიდვების სააგენტოს ვებგვერდზე განთავსებული ინფორმაციის მიხედვით, ტრენინგ-სემინარის ჩასატარებლად საბურთალოს გამგეობამ ტენდერში გამარჯვებული უკვე გამოავლინა და შესაბამისი ხელშეკრულებაც გააფორმა. ტრენინგის ორგანიზებას "საქართველოს ხელოვნების საბჭო" განახორციელებს.
ხელშეკრულების მიხედვით "საქართველოს ხელოვნების საბჭომ" უნდა უზრუნველყოს 140 ადამიანის ბაკურიანში ტრანსპორტირება სამი ავტობუსით, სასტუმრო "თბილისში" დაბინავება, მომსახურების ვადებში დელეგაციის წევრების ჯანმრთელობისა და ტრანსპორტირების დაზღვევა.
ტრენინგ-სემინარი 13-16 დეკემბერს გაიმართება.
საბურთალოს რაიონის გამგეობა ამხანაგობების თავმჯდომარეებისთვის მიმდინარე წლის განმავლობში სემინარს უკვე მეორედ მართავს. გამგეობამ 300 თავმჯდომარისთვის სამდღიანი სემინარი ივლისში გამართა, რისთვისაც 132 000 ლარი დახარჯა.
v-if="article.gallery" v-html="article.gallery"
