სოსო ჯაჭვლიანის შიშით თქვენ ძალიან კარგი ქართველი მწერლის, ზურაბ ქარუმიძის მარგინალიზაციას ახდენთ, - ასე მიმართა პარლამეტის იურიდიულ საკითხთა კომიტეტის სხდომათა დარბაზში შესულმა მოქალაქე გიორგი ხასაიამ პარლამენტის იურიდიული კომიტეტის წევრებს.
გიორგი ხასაია პარლამენტის იურიდიულ საკითხთა კომიტეტის დღევანდელ სხდომაზე შევიდა და მიკროფონთან ტექსტი წაიკითხა.
როგორც თავად აღნიშნა, ეს იყო ნაწყვეტი ზურაბ ქარუმიძის ნაწარმოებიდან - ”მელია-ტულეფია”. თუმცა, მას ტექსტის დასრულების შესაძლებლობა არ მისცეს და დარბაზი დაატოვებინეს.
გიორგი ხასაიას განცხადებით, ის ერთ-ერთ მედიასაშუალებაში მუშაობს და პარლამენტში ერთჯერადი საშვით იყო შესული.
გავრცელდა ინფორმაცია, რომ დიდ ბრიტანეთში საქართველოს ელჩად მწერალ ზურაბ ქარუმიძის კანდიდატურა განიხილებოდა, თუმცა ეს ინფორმაცია საქართველოს საგარეო უწყებამ არ დაადასტურა.
ამასთან, გუშინ პრესაში გამოქვეყნდა დეპუტატ სოსო ჯაჭვლიანთან ინტერვიუ ზურა ქარუმიძის შესახებ, სადაც მისი ელჩად შესაძლო დანიშვნას აპროტესტებს.
