საპარლამენტო უმრავლესობის ლიდერი დავით საგანელიძე პარლამენტის სპიკერატიდან და საკომიტეტო თანამდებობებიდან "თავისუფალი დემოკრატების" გადაყენების საკითხის დასმას აპირებს. გარდა ამისა, საგანელიძე გეგმავს, მმართველი გუნდის წინაშე აჭარის კვოტით დამტკიცებული ვიცე-სპიკერის მურმან დუმბაძის თანამდებობიდან გამოწვევის საკითხიც დასვას.

ამის შესახებ ჟურნალისტებთან უმრავლესობის ლიდერმა პარლამენტის თავმჯდომარის გუშინდელი განცხადების კომენტირებისას ისაუბრა. როგორც საგანელიძე აცხადებს, "საპარლამენტო კვოტები, რომელიც არის უმრავლესობის, უნდა ჰქონდეს უმრავლესობას", რაც მისივე განმარტებით, ორ ვიცე-სპიკერსა და კომიტეტის თავმჯდომარეების თანამდებობებს ეხება.

"ალბათ ხედავთ, ბოლო ორი წელია პარლამენტი ყოველთვის დაძაბულ რეჟიმში მუშაობს. დარწმუნებული ვარ, ასეთივე დაძაბული იქნება საგაზაფხულო სესიაც – დატვირთული როგორც საკანონმდებლო ინიციატივებით, ასევე იმ საკადრო გადაწყვეტილებებით, რაც პარლამენტმა უნდა მიიღოს. ეს ეხება სასამართლოს სფეროს, მარეგულირებელ კომისიას და იმ სხვა სფეროებს, სადაც დანიშვნები პარლამენტის პრეროგატივაა. რაც შეეხება ვიცე-სპიკერის და კომიტეტის თავმჯდომარეების საკითხს, ვარ უმრავლესობის ლიდერი და ბუნებრივია, უმრავლესობის კვოტას ვიცავ, რაც დღეის მდგომარეობით, დარღვეულია, ამიტომ აღნიშნულ საკითხს დავაყენებ. ამ თემაზე ფრაქციებთან, პოლიტსაჭოზე მსჯელობა ჯერ არ ყოფილა, მაგრამ საკითხს განხილვისთვის დავაყენებ", - განუცხადა ჟურნალისტებს საგანელიძემ.

მან აქვე აღნიშნა, რომ დეპუტატებს, რომელთაც საკითხი ეხება პირადად ძალიან დიდ პატივს სცემს, მაგრამ მისივე თქმით, "ამ შემთხვევაში საუბარია არა პირად სიმპატია-ანტიპატიაზე, არამედ პარლამენტის რეგლამენტზე, წესზე და კვოტებზე, რაც არის უმრავლესობის".

როგორც გუშინ საქართველოს პარლამენტის თავმჯდომარემ ჟურნალისტებთან საუბრისას განაცხადა, პარლამენტის საგაზაფხულო სესია ბევრი მნიშვნელოვანი საკანონმდებლო, პოლიტიკური, საკადრო გადაწყვეტილებით იქნება დატვირთული.