რამდენიმე არასამთავრობო უზენაესი სასამართლოს თავმჯდომარის კანდიდატურად ნინო გვენეტაძის წარდგენას მიესალმება

რამდენიმე არასამთავრობო ორგანიზაცია საქართველოს პრეზიდენტის, გიორგი მარგველაშვილის მიერ უზენაესი სასამართლოს თავმჯდომარის კანდიდატად ნინო გვენეტაძის წარდგენას მიესალმება.

როგორც არასამთავრობოების ერთობლივ განცხადებაშია ნათქვამი, მოხარულები არიან, რომ სწორედ მათ მიერ დასახელებული კანდიდატურა შეარჩია პრეზიდენტმა და წარუდგინა საქართველოს პარლამენტს განსახილველად.

"ამავე დროს საზოგადოებას კიდევ ერთხელ შევახსენებთ, თუ რატომ შევაჩერეთ არჩევანი მასზე.

ნინო გვენატაძე ნამდვილად გამორჩეულია თავისი მაღალი სამართლებრივი კვალიფიკაციით, მართლმსაჯულების სფეროში წარმატებული და გრძელვადიანი მოღვაწეობით, პრინციპულობით, სამართლიანობითა და შეუვალობით. რაც მთავარია, იგი არ არის არც ერთი პოლიტიკური პარტიის წევრი, რაც დამატებით უზრუნველყოფს მის მიუკერძოებლობას და ობიექტურობას ესოდენ საპასუხისმგებლო თანამდებობაზე.

მიგვაჩნია, რომ სამართლიანი სასამართლო სისტემა განსაკუთრებულ მნიშვნელობას იძენს კანონის უზენაესობის დასამკვიდრებლად, რაც ამასთანავე უზრუნველყოფს დამოუკიდებელ, გამჭვირვალე და სამართლიან მართლმსაჯულებას ქვეყანაში. შესაბამისად, მომავალი უზენაესი სასამართლოს თავმჯდომარე გვესახება ამ მნიშვნელოვანი პროცესის ერთ-ერთ მთავარ მონაწილედ.

მნიშვნელოვანია, რომ ქალბატონ ნინო გვენეტაძეს აქვს უზენაეს სასამართლოში მოსამართლედ და მოსამართლეთა კონფერენციის ხელმძღვანელად მუშაობის გამოცდილება. ამ თანამდებობებზე მუშაობისას იგი ჯერ კიდევ 2005 წლიდან იბრძოდა საქართველოში სასამართლო ხელისუფლების დამოუკიდებლობისათვის, რის გამოც წინა ხელისუფლების პირობებში, ფაქტობრივად, იგი იქცა დევნილად, როდესაც რეალურად მხოლოდ პოლიტიკური მოტივაციით გაათავისუფლეს თანამდებობიდან.

მანკიერი სასამართლო სისტემის დაუმორჩილებელი მოსამართლეებისადმი სოლიდარობის ნიშნად ნინო გვენეტაძე 2006 წელს გაერთიანდა არსამათავრობო ორგანიზაციათა კოალიციაში "სამოქალაქო საზოგადოება - დემოკრატიული საქართველოსთვის", სადაც სამოქალაქო საზოგადოებასთან ერთად იბრძოდა საქართველოში დამოუკიდებელი და სამართლიანი მართლმსაჯულების დასამკვიდრებლად.

მიგვაჩნია, რომ ქალბატონი ნინო საზოგადოებაში სარგებლობს მაღალი ლეგიტიმაციით, აქვს პროფესიული ცოდნა და პრაქტიკული გამოცდილება. ამასთანავე, იგი არის იურიდიულ მეცნიერებათა დოქტორი და წარმატებით მუშაობს აკადემიური მიმართულებით", - ნათქვამია ერთობლივ განცხადებაში.

განცხადება ხელს აწერენ: "ადამიანის უფლებათა ცენტრი"; "საზოგადოებრივი დამცველი" "ადამიანის უფლებათა პრიორიტეტი"; "ახალგაზრდები სამართლიანობისთვის"; "მედიის ინსტიტუტი"; "იურისტ ქალთა კავშირი".

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024