ზუგდიდის ავტოსადგურში მიკროავტობუსების მძღოლების საპროტესტო აქცია იმართება. როგორც "ინტერპრესნიუსის" კორესპონდენტი იუწყება, გაფიცულია ზუგდიდი-თბილისის და სხვა ქალაქების მიმართულებით მოძრავი მიკროავტობუსების მძღოლები.

აქციის მონაწილეები ზუგდიდში თურქული სატრანსპორტო კომპანია "მეტროს" შესაძლო შემოსვლას აპროტესტებენ. მძღოლები შიშობენ, რომ თუ თურქული კომპანია ზუგდიდში შემოვა სამსახურს დაკარგავენ, რომელიც მათი შემოსავლის ერთადერთი წყაროა.

აქციაზე ცოტა ხნის წინ სიტყვიერი და ფიზიკური დაპირისპირება მოხდა გაფიცულ მძღოლებსა და ავტოსადგურის დისპეტჩერს შორის, რომელმაც მძღოლებს აქციის შეწყვეტისკენ და მუშაობის გაგრძელებისკენ მოუწოდა. სიტყვიერი დაპირისპირება ფიზიკურ დაპირისპირებაში გადაიზარდა და აქციის ერთი მონაწილე ზუგდიდის პოლიციის სამმართველოში დაკითხვაზე გადაიყვანეს.