ზუგდიდში მძღოლებმა სენაკი-ლესელიძის ცენტრალური მაგისტრალი გადაკეტეს. გზა გადაკეტილი ნახევარი საათის განმავლობაში იყო. სამართალდამცავების ჩარევის შემდეგ გზა გაიხსნა. მძღოლებმა ამჟამად გადაინაცვლეს სამეგრელოს სამხარეო ადმინისტრაციის შენობასთან.

მძღოლების განცხადებით, თუ მათი მოთხოვნები არ დაკმაყოფილდება, ენგურის ხიდზე გადავლენ და რუსეთის მოქალაქეობას მოითხოვენ.

როგორც "ინტერპრესნიუსის" კორესპონდენტი იუწყება, ზუგდიდში, საპროტესტო აქცია ზუგდიდი-თბილისისა და სხვა საქალაქთაშორისო ავტობუსების და მიკროავტობუსების მძღოლებმა გამართეს. ისინი ადგილობრივ ბაზარზე თურქული სატრანსპორტო კომპანია "მეტრო პლიუსის" შესვლას აპროტესტებენ.

აქციის მონაწილეების განცხადებით, კომპანიის მუშაობის შემთხვევაში, ყველა მათგანი ერთადერთი შემოსავლის წყაროს გარეშე რჩება.

"მეტრო პლიუსის" პირველი რეისი კი ზუგდიდის ავტოსადგურიდან სამართალდამცველების დახმარებით მაინც გავიდა. კომპანიის წარმომადგენლის განცხადებით, ისინი მომხმარებელს მეტ კომფორტს სთავაზობენ.