ჩოხატაურის ბორის პაიჭაძის სახელობის ცენტრალურ სტადიონს რეაბილიტაცია ჩაუტარდება. სპორტისა და ახალგაზრდობის საქმეთა სამინისტროს ინფორმაციით, ჩოხატაურის სტადიონზე სპორტსმენები ტარიელ ხეჩიკაშვილმა მოინახულა და სპორტული ინვენტარი გადასცა. სპორტისა და ახალგაზრდობის საქმეთა მინისტრი რეგიონებში სპორტული ინფრასტრუქტურის დათვალიერებას განაგრძობს. ცოტა ხნის წინ სტადიონზე არსებულ ვითარებას ფეხბურთის ფედერაციის პრეზიდენტი ლევან კობიაშვილიც გაეცნო.

სტადიონი გასული საუკუნის 50-იან წლებში აშენდა და თავდაპირველად მას იპოდრომის ფუნქციაც ჰქონდა. კომპლექსი ბალახისსაფარიანი 2 სტანდარტული საფეხბურთო და 1 სარაგბო მოედნისგან შედგება. ტრიბუნა გათვლილია 2 000 მაყურებელზე. კომპლექსის ირგვლივ არსებული ტერიტორია იძლევა იმის საშუალებას, რომ დამატებით მოეწყოს ხელოვნურსაფარიანი 1 სტანდარტული და 6-მდე მინი მოედანი.

ამ ეტაპზე სტადიონით 4 საფეხბურთო და 3 სარაგბო ასაკობრივი ჯგუფი სარგებლობს, სულ 400-მდე ბავშვი. მუნიციპალიტეტის ორგანიზებით რეგულარულად ტარდება შიდა ტურნირები, გუნდები ასევე მონაწილეობას იღებენ დასავლეთ საქართველოს ტურნირებში.