ჩვენ რუსულ პროვოკაციებს არ უნდა ავყვეთ, მაგრამ ეს იმას არ ნიშნავს, რომ უნდა დავნებდეთ და ხმა არ უნდა ამოვიღოთ ყველა იმ ქმედებაზე, რომელსაც ოკუპანტი ახორციელებს, - ასე გამოეხმაურა საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე სოფელ ყარაფილასთან საოკუპაციო ძალების მიერ თხრილის გავლების მორიგ ფაქტს.

ჯანელიძე ე.წ. საზღვართან თხრილის გავლების კიდევ ერთ შემთხვევას “პროვოკაციას“ უწოდებს და განმარტავს, რომ სამუშაოები, რომელსაც სოფლებში საოკუპაციო რეჟიმი ახორციელებს, საოკუპაციო ხაზის დაფიქსირებას უკავშირდება.

“ჩვენ ამ ფაქტს, ისევე როგორც ყველა წინა ფაქტს ძალიან მკაცრს შეფასებას ვაძლევთ. პარტნიორებთან ერთად ვმუშაობთ, რომ ეს პროცესი, პროვოკაციული ქმედებები შეჩერდეს. პირველ რიგში, ეს არის პროვოკაცია. მნიშვნელოვანია, რომ საერთაშორისო საზოგადოებასთან ერთად მოვახერხოთ პროვოკაციული ქმედებების შეჩება. ეს არის ის პოლიტიკა, რომელსაც ჩვენ აქტიურად განვახორციელებთ მომდევნო წლის განმავლობაში. ჩვენ გვაქვს უპრეცედენტო მხარდაჭერა საერთაშორისო საზოგადოების მხრიდან. ოკუპირებულ რეგიონებში რუსეთის ფედერაციის აგრესიული ქმედებები უმკაცრესად არის შეფასებული და დაგმობილი“, - განუცხადა ჟურნალისტებს მიხეილ ჯანელიძემ.

მან აქვე აღნიშნა, რომ საქართველოს გააჩნია მხოლოდ დიპლომატიური არხები და ინსტრუმენტები იმისთვის, რომ მოახდინოს კონფლიქტის მშვიდობიანი დარეგულირება, შეაჩეროს რუსეთის აგრესია, ოკუპაცია და იზრუნოს დეოკუპაციაზე.

ამასთან, ჯანელიძის თქმით, ამას სჭირდება მოთმინება და ერთიანი მიდგომა ქვეყნის შიგნით.