მსახიობ დავით როსტომაშვილზე თავდასხმაში ერთ-ერთი ბრალდებულის დედა მოითხოვს, რომ ყაჩაღობის მუხლი ცემის მუხლით შეიცვალოს

მსახიობ დავით როსტომაშვილზე თავდასხმაში ერთ-ერთი ბრალდებულის დედა მოითხოვს, რომ მისი შვილისთვის წაყენებული ყაჩაღობის მუხლი ცემის მუხლით შეიცვალოს.

როგორც “ინტერპრესნიუსთან” საუბრისას ბრალდებული ბექა კირვალიძის დედამ, ლია ბეჟაშვილმა განაცხადა, არ არსებობს მტკიცებულება, რომ მოხდა ყაჩაღობა, შესაბამისად საჭიროა გადაკვალიფიცირდეს ბრალდება ცემის მუხლით.

სამართალდამცავებმა მსახიობ დავით როსტომაშვილზე თავდასხმისთვის ძებნილი პირი დააკავეს. შსს-ს ინფორმაციით, დაკავებული ამ დროისთვის პენიტენციურ დაწესებულებაში იმყოფება.

აღსანიშნავია, რომ დაკავებულია ის პირია, რომელმაც ბადრაგირების დროს გაქცევა მოახერხა.

„შსს-ს თბილისის პოლიციის დეპარტამენტის გლდანი-ნაძალადევის სამმართველოს თანამშრომლებმა 2017 წლის 14 ივნისიდან ყაჩაღური თავდასხმის ბრალდებით ძებნილი, 1992 წელს დაბადებული ბ.კ. თბილისში დააკავეს. გამოძიებამ დაადგინა, რომ აღნიშნულმა პირმა, თანამზრახველებთან ერთად, 2017 წლის 14 ივნისს თბილისში, ბერი გაბრიელ სალოსის ქუჩაზე, მოქალაქე დავით როსტომაშვილზე ყაჩაღური თავდასხმა განახორციელა.

ბ.კ.-მ, თბილისის დროებითი მოთავსების იზოლატორში შესახლებამდე, ბადრაგირების დროს, გაქცევა მოახერხა. ამჟამად, დაკავებული ბ.კ. მე-8 პენიტენციურ დაწესებულებაშია შესახლებული.

ამავე ყაჩაღობის ფაქტზე, ბრალდებულის სახით, ასევე, დაკავებულია 1991 წელს დაბადებული ზ. ქ. და 1988 წელს დაბადებული ა.ა.

გამოძიება საქართველოს სსკ-ს 179-ე მუხლით მიმდინარეობს“, - ნათქვამია შსს-ს მიერ გავრცელებულ ინფორმაციაში.