საერთაშორისო თანამეგობრობა გვიყურებს, როგორც ერთ მთელ ორგანიზმს, რომელიც ჯერ არ დამწიფებულა და არ ჩამოყალიბებულა, როგორც სახელმწიფო და ამის ერთ–ერთი განმაპირობებელია პრეზიდენტის ინსტიტუტის მავნებლობა, - ამის შესახებ საპარლამენტო მიმართვისას, საპარლამენტო უმრავლესობის ერთ–ერთმა ლიდერმა, გია ვოლსკიმ განაცხადა.

როგორც დეპუტატმა აღნიშნა, დღეს მომხდარი მოვლენები ყველა ზღვარს სცილდება და წუხილს გამოთქვამს, რომ წლების წინ საზოგადოებას მარგველაშვილის მხარდაჭერისკენ მოუწოდებდა.

„რაც აქ მოხდა, მგონია, რომ ყოველგვარ ზღვარს სცილდება. სამწუხაროა რომ ჩვენ ვერ მოვახერხეთ იმ ხარისხის დებატების გამართვა, რომლის წინაპირობა უნდა მოეცა პრეზიდენტ მარგველაშვილს. სამწუხაროა, რომ სამწუხაროდ ვიგონებ იმ პერიოდს, როდესაც სოფელ-სოფელ დავდიოდი და მარგველაშვილის კანდიდატურას წარვუდგენდი საზოგადოებას. სამწუხაროა ის შეცდომები, რომელიც დაუშვა პრეზიდენტმა, მაგრამ არავინ იცის ჩვენ ერთმანეთთან რა ურთიერთობა გაგვაჩნია. საერთაშორისო თანამეგობრობა გვიყურებს, როგორც ერთ მთელ ორგანიზმს, რომელიც ჯერ არ დამწიფებულა და არ ჩამოყალიბებულა, როგორც სახელმწიფო და ამის ერთ–ერთი განმაპირობებელია პრეზიდენტის ინსტიტუტის მავნებლობა. სამწუხაროა, რომ დღეს ამ სიტყვების თქმა მიხდება ამ ტრიბუნიდან“, - განაცხადა გია ვოლსკიმ.