ირაკლი კობახიძე - ჩვეულებრივ პრაქტიკად იქცა გიორგი მარგველაშვილის მხრიდან დამოუკიდებელ ინსტიტუტებსა და ორგანოებში საკუთარი თანამშრომლების დანიშვნა

ჩვეულებრივ პრაქტიკად იქცა გიორგი მარგველაშვილის მხრიდან დამოუკიდებელ ინსტიტუტებსა და ორგანოებში საკუთარი თანამშრომლების დანიშვნა, - ამის შესახებ საქართველოს პარლამენტის თავმჯდომარემ, ირაკლი კობახიძემ პარლამენტის სხდომაზე განაცხადა.

როგორც კობახიძემ აღნიშნა, ასეთი პრაქტიკა შეეხო საკონსტიტუციო და უზენაეს სასამართლოს, იუსტიციის უმაღლეს საბჭოს და მარეგულირებელ კომისიას.

„როდესაც საქმე ეხება ინსტიტუტების მიმართ უპასუხისმგებლო, არასწორ დამოკიდებულებას, აუცილებლად უნდა გავიხსენოთ, რომ ჩვეულებრივ პრაქტიკად იქცა გიორგი მარგველაშვილის მხრიდან დამოუკიდებელ ინსტიტუტებში და ორგანოებში საკუთარი თანამშრომლების დანიშვნა. შეგახსენებთ, ასეთი პრაქტიკა შეეხო საკონსტიტუციო სასამართლოს. თავისი ორი თანამშრომელი დანიშნა მან საკონსტიტუციო სასამართლოში, ასევე, უზენაეს სასამართლოში, იუსტიციის უმაღლეს საბჭოში, მარეგულირებელ კომისიაში, რაც არის შემაშფოთებელი ტენდენცია. პრეზიდენტის მხრიდან თავისი თანამშრომლების გაგზავნა ყველგან, დამოუკიდებელ ორგანოში არის აბსოლუტურად შემაშფოთებელი პრაქტიკა“, - განაცხადა კობახიძემ.

პარლამენტის თავმჯდომარემ ასევე აღნიშნა, რომ გიორგი მარგველაშვილი ცდილობდა შეექმნა კორექტული ადამიანის იმიჯი, თუმცა რისი კეთებაც არ სურდა მას პიროვნულად, ის თავის თანამშრომლებს აკეთებინებდა.

„მინდა გავიხსენო ის შეურაცხყოფები, რომელსაც პრეზიდენტის ადმინისტრაციის თანამშრომლები აყენებდნენ სხვადასხვა პოლიტიკოსებს, განსაკუთრებით საქართველოს პარლამენტის წევრებს. არაერთხელ აღნიშნა გიორგი მარგველაშვილმა, რომ მას სიტყვა არასდროს გაქცევია, თუმცა რეალობა განსხვავებული იყო. ის ცდილობდა თავისთვის შეექმნა კორექტული ადამიანის იმიჯი, თუმცა რისი კეთებაც არ სურდა მას პიროვნულად, ის აკეთებინებდა თავის თანამშრომლებს და ჩვენ გვახსოვს უმძიმესი შეურაცხყოფები პრეზიდენტის ადმინისტრაციის თანამშრომლების მხრიდან. ეს იყო პრეზიდენტის ადმინისტრაციის უფროსი, საპარლამენტო მდივანი, მრჩევლები და ა.შ. ეს ნამდვილად არ შეშვენის საქართველოს პრეზიდენტს და მე დარწმუნებული ვარ, რომ ეს პრაქტიკა სამუდამოდ დასრულდება მას შემდეგ, რაც ჩვენ ავირჩევთ საქართველოს პრეზიდენტს 2018 წლის საპრეზიდენტო არჩევნებში“, - განაცხადა ირაკლი კობახიძემ.

ეკატერინე დგებუაძე - შემიძლია დაგიდასტუროთ, რომ არცერთი მოსწავლე არ დარჩება სასწავლო განათლების მიღმა
ქართული პრესის მიმოხილვა 06.04.2020
ვაჟა ბერიძე - მთავრობა სწრაფად და ეფექტიანად რეაგირებს გამოწვევებზე, ეს სადღეისოდ საკმარისია, მაგრამ ტაში და ვაშა ჯერჯერობით ნაადრევია
"ლიბერთის" 500 000-ლარიანი მხარდაჭერა ბავშვთა მცირე საოჯახო სახლებს
კომპანია "ნოვა" პანდემიის გამოწვევის დასაძლევად 65 000 ლარს გამოყოფს