საჩხერის მუნიციპალიტეტში წყალმომარაგების სისტემის რეაბილიტაცია მიმდინარეობს. როგორც „ინტერპრესნიუსს“ საქართველოს რეგიონული განვითარებისა და ინფრასტრუქტურის სამინისტროდან აცნობეს, სამინისტროს „მუნიციპალური განვითარების ფონდი“ საჩხერის მუნიციპალიტეტში, გორისას და ჩიხის ადმინისტრაციულ ერთეულებში შემავალი, სოფლების წყალმომარაგების სისტემის რეაბილიტაციას ახორციელებს. სამუშაოების მიმდინარეობას „მუნიციპალური განვითარების ფონდის აღმასრულებელი დირექტორის მოვალეობის შემსრულებელი ჯუანშერ ბურჭულაძე გაეცნო.

პროექტი გორისა და ჩიხაში რეზერვუარების მოწყობას, არსებული ჭაბურღილების რეაბილიტაციას და ახალი სატუმბი სადგურის მშენებლობას ითვალისწინებს. პროექტის დასრულების შემდეგ 5 სოფლის დაახლოებით 5 600 მოსახლეს წყალმომარაგების პრობლემა მოუგვარდებათ.

პროექტი „ევროპის საინვესტიციო ბანკის“ დაფინანსებით ხორციელდება და მისი ღირებულება დაახლოებით 8 მილიონი ლარია. წყალმომარაგების სისტემის რეაბილიტაცია 2019 წლის ზაფხულში დასრულდება.