საკონსტიტუციო სასამართლოს პირველი კოლეგია საბერძნეთის მოქალაქეების სარჩელს საქართველოს პარლამენტის წინააღმდეგ განიხილავს. სადაო ნორმის მიხედვით, საქართველოს პარლამენტის მიერ შეჩერებულია უცხოელი ფიზიკური და იურიდიული პირის საკუთრების უფლება სასოფლო-სამეურნეო დანიშნულების მიწებზე. სარჩელის ავტორები საქართველოში მიწის დაკანონებას ითხოვენ.

როგორც მოსარჩელე მხარის წარმომადგენელი აცხადებს, მათ აღნიშნული ქონება მემკვიდრეობით მიიღეს და საქართველოში არსებული კანონმდებლობით ვერ ირეგისტრირებენ.

მოსარჩელეები სადაო ნორმის არაკონსტიტუციურად ცნობას ითხოვენ.

"მოსარჩელეები არიან საქართველოს ყოფილი მოქალაქეები, რომლებმაც მოქალაქეობა დაკარგეს. ისინი საბერძნეთის მოქალაქეები არიან და სადაო ნორმის მიხედვით, ვერ იღებენ საქართველოს მოქალაქისგან-საკუთარი მშობლებისგან დატოვებულ მემკვიდრეობას და ასევე მეორე შემთხვევაში ადამიანი მისი ხელით აშენებულ ქონებას ვერ ირეგისტრირებს. ორივე შემთხვევაში მათ ეზღუდებათ უფლება. საქართველოს პარლამენტმა მანამდეც მიიღო მსგავსი კანონი, რომელიც სასამართლომ უკვე ორჯერ ცნო არაკონსტიტუციურად და ძალადაკარგულად გამოაცხადა. დღეს მესამეჯერ გვიწევს იგივე საკითხზე მსჯელობა. ამ შემთხვევაშიც მიგვაჩნია, რომ სადაო ნორმას საკონსტიტუციო სასამართლო კვლავ ძალადაკარგულად ცნობს. არ არსებობს რაიმე საჯარო ინტერესი რომელიც დაასაბუთებდა თუ რატომ არ უნდა ჰქონოდა უცხო ქვეყნის მოქალაქეებს საქართველოში საკუთრების შეძენის თუ მემკვიდრეობის მიღების უფლება",- აცხადებს მოსარჩელე მხარის წარმომადგენელი მარინა კაპანაძე.