წალკის მუნიციპალიტეტის სოფლებში აჭარის მაღალმთიანი სოფლებიდან ჩასახლებულმა მოსახლეობამ, სოფელ ხარებაში საპროტესტო აქცია გამართა. აქციის მონაწილეები ცენტრალური ხელისუფლებისგან წალკაში საცხოვრებელი სახლების შეძენას და მათთვის საკუთრებაში გადაცემას მოითხოვენ. როგორც სოფელ ხარების ცენტრში შეკრებილები აცხადებდნენ, წლების წინ წალკიდან საბერძნეთში ემიგრირებული ბერძნები უკან ბრუნდებიან და ეკომიგრანტებს დაკავებული სახლებიდან გამოსახლების საფრთხე შეექმნათ.
ისინი ცენტრალურ ხელისუფლებას მიმართავენ და პრობლემის გადაჭრას კატეგორიულად მოითხოვენ. მათი თქმით, თუ ხელისუფლება მათთვის საცხოვრებელ სახლებს არ გამოისყიდის ბერძნებისგან, მაშინ იაფი კრედიტით ან სამშენებლო მასალით მაინც დაეხმაროს, რომ კუთვნილ მიწის ნაკვეთებზე სახლი საკუთარი ძალებით ააშენონ.