ქობულეთში, სოფელ კვირიკეში მოსახლეობა საპროტესტო აქციას მართავს

ქობულეთში, სოფელ კვირიკეში მოსახლეობა საპროტესტო აქციას მართავს. როგორც აქციის მონაწილეები აცხადებენ, სოფელში კომპანია „ლიბერტი" ინერტულ მასალას მოიპოვებს, რის გამოც კლდის ნგრევა მიმდინარეობს. მათი ინფორმაციით, კლდის ნგრევამ და აფეთქებებმა სოფელში ეკოლოგიური პრობლემები გამოიწვია, დაიბზარა საცხოვრებელი სახლები. მოსახლეობა სამუშაოების შეჩერებას ითხოვს. აქციაზე „ერთიანი ნაციონალური მოძრაობის" ქობულეთის საკრებულოს წევრებიც იმყოფებოდნენ. როგორც დეპუტატი ლელა ვერულიძე ამბობს, კლდის დამუშავების პროცესში ქობულეთის საკრებულოს „ქართული ოცნების" წევრის ვაჟა შავიშვილის ძმაა ჩართული.

აქციის მონაწილეებს სამუშაოების შემსრულებელი კომპანია გამოეხმაურა. კომპანიაში აცხადებენ, რომ სამუშაოების ლიცენზია გააჩნიათ და თუ მოსახლეობა დაზარალდა, მათ ზარალი აუნაზღაურდებათ.