„თანასწორობის მოძრაობის“ ზუგდიდის ოფისის ხელმძღვანელმა ცაბუნია ვართაგავამ და მოქალაქე როსტომ ზარანდიამ პრეზიდენტობის დამოუკიდებელი კანდიდატის სალომე ზურაბიშვილის ზუგდიდში ჩასვლა გააპროტესტეს.

როგორც ცაბუნია ვართაგავამ ჟურნალისტებთან საუბარში აღნიშნა, სალომე ზურაბიშვილი ანტისახელმწიფოებრივ განცხადებებს აკეთებს.

„ჩვენ რომ ღირსეული სახელმწიფო ვიყოთ, სალომე ზურაბიშვილს საერთოდ არ უნდა ჰქონდეს პრეტენზია საქართველოს პრეზიდენტობის კანდიდატად იყაროს კენჭი. ზუსტად იმიტომ, რომ ადამიანი აკეთებს ანტისახელმწიფოებრივ განცხადებას, როდესაც ამბობს, რომ ომი დაიწყო საქართველომ და არ აღიარებს რუსულ ოკუპაციას“, - განაცხადა ვართაგავამ.

„თანასწორობის მოძრაობის“ ზუგდიდის ოფისის ხელმძღვანელს ცაბუნია ვართაგავას და მოქალაქე როსტომ ზარანდიას სალომე ზურაბიშვილის ერთ-ერთი მხარდამჭერი ლია ნაროუშვილი დაუპირისპირდა და მათ “ქვეყნის სირცხვილი“ უწოდა.

შეგახსენებთ, რომ პრეზიდენტობის დამოუკიდებელი კანდიდატი სალომე ზურაბიშვილი დღეს ხელმოწერების შეგროვების კამპანიის ფარგლებში ზუგდიდში იმყოფებოდა. ზურაბიშვილი ადგილობრივ მოსახლეობას და მხარდამჭერებს გაესაუბრა.

„დღეს ზუგდიდში ყველაზე უფრო თბილი განწყობაა, რაც მქონია სამეგრელოში. ის ხმები, რომ გეშინოდეთ ზუგდიდის - ეს ყველაფერი არის აბსოლუტურად ტყუილი. ძალიან კარგი განწყობაა და ყოველთვის ასე იყო. ზუგდიდის მიღება ყოველთვის იყო განსაკუთრებული. სექტემბრის ბოლოს კიდევ ჩამოვალ და ძალიან ბევრ საკითხებზე ვისაუბრებ“, - აღნიშნა მოსახლეობასთან შეხვედრისას სალომე ზურაბიშვილმა.