სოფელ შაშიანის საბავშვო ბაღში, რომელიც გუშინ დაარბიეს, სააღმზრდელო პროცესი შესაძლოა, რამდენიმე კვირის დაგვიანებით დაიწყოს

გურჯაანის მუნიციპალიტეტის სოფელ შაშიანის საბავშვო ბაღში სააღმზრდელო პროცესი შესაძლოა, რამდენიმე კვირის დაგვიანებით დაიწყოს. ამის შესახებ "ინტერპრესნიუსს" ბაღის მენეჯერმა განუცხადა. ნანა აბაშიძის თქმით, დაზიანებულია ყველა საჭირო ინვენტარი და დამტვრეულია ჭურჭელი, რის გამოც აღსაზრდელების მიღებას ვერ შეეძლებენ.

"დაზიანებულია ყველა საჭირო ინვენტარი. საწოლები და ჭურჭელი დამტვრეულია. ჩვენი ვარაუდით, რამდენიმე ადამიანი იყო და ისინი ფანჯრიდან შემოვიდნენ. არასამუშაო დრო ალბათ სპეციალურად შეარჩიეს, რომ არავის დაენახა. ჯერჯერობით არ ვიცით ვინ გააკეთა. სრულად განადგურებულია მეთოდური მასალები, საზამთროა ნაჭამი სათამაშოებზე. ვფიქრობ, სასწავლო პროცესს რამდენიმე კვირის დაგვიანებით დავიწყებთ", - განაცხადა ნანა აბაშიძემ.

ვითარებას ადგილზე გაეცნო გურჯაანის მერის მოადგილე. უკვე ჩატარდა შესაბამისი საგამოძიებო მოქმედებები. საქმეზე გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის ან ქონების დაზიანებას გულისხმობს.