ამბროლაურში განათლების ხელშეწყობის მიზნით პროგრამები ხორციელდება, რომლებიც საჯარო სკოლების კურსდამთავრებულთათვის სხვადასხვა შეღავათებს ითვალისწინებს.
როგორც „ინტერპრესნიუსს“ ამბროლაურის მუნიციპალიტეტის მერიიდან აცნობეს, ახალგაზრდებს, რომლებმაც მიმდინარე წელს სკოლა ოქროს ან ვერცხლის მედალზე დაამთავრეს, ფულადი ჯილდო (300 ლარი - ოქროს მედალოსანი, 200 ლარი - ვერცხლის მედალოსანი) გადაეცემათ.
500 ლარით დასაჩუქრდებიან საჯარო სკოლების ის კურსდამთავრებულები, რომლებმაც მიმდინარე წელს ერთიან ეროვნულ გამოცდებში 100%-იანი გრანტი მოიპოვეს.
ამასთან, უმაღლესი საგანმანათლებლო დაწესებულების პირველი კურსის, სოციალურად დაუცველ (65 001 ქულამდე) სტუდენტებს, რომლებმაც სკოლა მიმდინარე წელს დაამთავრეს, ამბროლაურის მუნიციპალიტეტის მერია სწავლის საფასურს (არა უმეტეს 2 000 ლარისა) აუნაზღაურებს.