ზუგდიდის მუნიციპალიტეტის სოფელ კახათში, ერთ-ერთი სახლის ჭიშკართან მიტოვებული ბავშვის მდგომარეობა დამაკმაყოფილებელია. ამის შესახებ „ინტერპრესნიუსს“ ზუგდიდის რეფერალურ ჰოსპიტალში განუცხადეს. კლინიკური მენეჯერის, სულხან ორჟონიას თქმით, ამ ეტაპზე ახალშობილი სტაბილურადაა, თუმცა ინფექციის განვითარების რისკები არსებობს.

„ამ დროისთვის მისი მდგომარეობა დამაკმაყოფილებელია, თუმცა არის რიკები, რომ ინფექცია განვითარდეს, რადგან ჩვილი გარეთ იქნა ნაპოვნი“, - განაცხადა სულხან ორჟონიამ.

შემთხვევა დღეს დილით მოხდა. არსებული ინფორმაციით, ჩვილი წვიმიან ამინდში, სახლის ჭიშკარზე ჩანთით ჩამოკიდებული დატოვეს.

მომხდარზე შს სამინისტრომ გამოძიება სისხლის სამართლის კოდექსის 127-ე მუხლით დაიწყო, რაც ახალშობილის უმწეო მდგომარეობაში მიტოვებას გულისხმობს.