სახელმწიფო უსაფრთხოების სამსახურში „ბოტანიკური ბაღების მართვის ცენტრის“ საქმეზე ზუგდიდის მერი ლაშა გოგია გამოკითხეს. ამის შესახებ „ინტერპრესნიუსს" სუს-ში განუცხადეს.
„ბოტანიკური ბაღების მართვის ცენტრის საქმიანობის შესწავლა მიმდინარეობს. ამ შესწავლის ფარგლებში დაიკითხა ზუგდიდის მერი“, - განაცხადეს სუს-ში.
ამავე საქმეზე უკვე გამოიკითხა „ბოტანიკური ბაღების მართვის ცენტრის” უფროსი ზვიად ქარჩავა. ქარჩავას თქმით, მან გამოძიებას ა(ა)იპ-ის საქმიანობის შესახებ მიაწოდა ინფორმაცია. რაც შეეხება მერს ლაშა გოგიას, ის ამჟამად საქართველოში არ იმყოფება.
სახელმწიფო უსაფრთხოების სამსახურის ანტიკორუფციულმა სააგენტომ, შესაძლო დანაშაულის გამოვლენის მიზნით, ა(ა)იპ "ბოტანიკური ბაღების მართვის ცენტრის" საქმიანობის შესწავლა გასულ თვეს დაიწყო. მაშინ მერიაში აცხადებდნენ, რომ ორგანიზაციას ყველაფერი წესრიგში აქვს.