ჯანდაცვის მინისტრის მოადგილე შრომის უსაფრთხოების კანონმდებლობის თაობაზე, ბიზნესმენებს და მუნიციპალიტეტების წარმომადგენლებს ხვდება
შრომის უსაფრთხოების კანონმდებლობის ამოქმედებასთან დაკავშირებით, ბათუმში ადგილობრივ ბიზნესმენებთან და მუნიციპალიტეტების წარმომადგენლებთან საქართველოს ჯანდაცვის მინისტრის მოადგილე თამილა ბარკალაია შეხვედრას მართავს.
როგორც თამილა ბარკალაიამ ჟურნალისტებს განუცხადა, აღნიშნული კანონმდებლობა პირველი აგვისტოდან ამოქმედდა და შეხვედრის მიზანი სწორედ ის არის, რომ ადგილობრივ დონეზე ინფორმირება მოხდეს.
„დღეს ადგილობრივი მუნიციპალიტეტების წარმომადგენლებს და ადგილობრივი ბიზნესმენებს ვხვდებით. შრომის უსაფრთხოება პრიორიტეტია და ახალი კანონმდებლობა მოგეხსენებათ პირველ აგვისტოს ამოქმედდა, კერძოდ, ძალაში შევიდა შრომის ინსპექციის გაფართოებული მანდატი მძიმე, მავნე და საშიშ პირობებიან სამუშაოებთან დაკავშირებით. ჩვენ დავიწყეთ ინსპექტირებები და გვინდა, რომ მივაწოდოთ ინფორმაცია ადგილობრივ ბიზნესებს და მუნიციპალიტეტების წარმომადგენლებს, თუ რა მექანიზმები არსებობს შრომის უსაფრთხოების, როგორ უნდა დაიცვას და რა პასუხისმგებლობები და ვალდებულებები აქვს როგორც დასაქმებულებს, ასევე დამსაქმებლებს და რა როლი შეიძლება ჰქონდეს ადგილობრივ მუნიციპალიტეტებს, რომ უზრუნველყონ შრომის უსაფრთხოება თავის მუნიციპალიტეტებში ",-განაცხადა თამილა ბარკალაიამ.
