აჭარის ტურიზმის დეპარტამენტის მოწვევით რეგიონს ფრანგი და გერმანელი ჟურნალისტები სტუმრობენ, - ამის შესახებ „ინტერპრესნიუსს“ აჭარის ტურიზმისა და კურორტების დეპარტამენტიდან აცნობეს.

მათივე ინფორმაციით, მედიატურის ძირითადი მიზანი ქართული სამზარეულოს წარმოჩენაა.

„ჟურნალისტები რეგიონში ქართულ კერძებსა და მათი მომზადების წესებს ეცნობიან. მათ ასევე, დაათვალიერეს ბათუმის ძირითადი ტურისტული ღირსშესანიშნაობები, ბათუმის ბოტანიკური ბაღი, მთიანი აჭარა თავისი ღვინის მარნებითა და ტურისტული პროდუქტებით. ისინი ქართული სამზარეულოსა და რეგიონის ტურისტული პროდუქტების შესახებ სტატიებს ფრანგული და გერმანული მედიაგამოცემებისთვის მოამზადებენ.

წელს, აჭარის ტურიზმის დეპარტამენტის ორგანიზებით რეგიონის ტურისტულ პროდუქტებს 200-მდე ჟურნალისტი და ტურისტული სააგენტოს წარმომადგენელი გაეცნო. შედეგად, აჭარის ტურისტული პოტენციალის შესახებ სამიზნე ქვეყნების ტელევიზიებსა და ონლაინ მედიაში ათობით სტატია, რეპორტაჟი და გადაცემა მომზადდა. სექტემბრის ბოლომდე რეგიონს განმეორებით საერთაშორისო ტელეკომპანიების “ევრონიუსისა“ და „დოიჩე ველეს“ გადამღები ჯგუფები ეწვევიან. „ევრონიუსის“ ჟურნალისტები ბათუმში ჭადრაკის მსოფლიო ოლიმპიადას, "დოიჩე ველეს" კი ქალაქის ძირითად ტურისტულ ღირსშესანიშნაობებს გაუწევენ პოპულარიზაციას“, - ნათქვამია ინფორმაციაში.