გარემოს დაცვისა და სოფლის მეურნეობის სამინისტრო ბორჯომის ხეობაში, სოფელ დაბაში, 2008 და 2017 წლებში, ხანძრით დაზიანებული ტყის აღდგენით სამუშაოებს იწყებს.
როგორც „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს, 13 სექტემბერს, 12:00 საათზე, გარემოს დაცვისა და სოფლის მეურნეობის სამინისტროს, თიბისი ბანკს, ეროვნულ სატყეო სააგენტოსა და ეროვნულ საშენ მეურნეობას შორის თანამშრომლობის მემორანდუმი გაფორმდება, რომლის თანახმად, თიბისი ბანკი 2017 წელს ბორჯომში გაჩენილი ხანძრის შედეგად გადამწვარი ტყის 10 ჰექტარს სრულად აღადგენს.
„თიბისი ბანკი“ იყო ერთ-ერთი პირველი კომპანია, რომელიც დამწვარი ტყის მასივის განახლების ღონისძიებებში ჩართვის ინიციატივით გამოვიდა. ტყის მასივის აღდგენითი სამუშაოები სექტემბრის ბოლოდან დაიწყება“, - ნათქვამია სამინისტროის მიერ გავრცელებულ ინფორმაციაში.