ზუგდიდის მერის ლაშა გოგიას მოადგილის მაიზერ ნანავას განცხადებით, მისთვის მოულოდნელი იყო სოციალურ ქსელში ლაშა გოგიას მიერ გადადგომის შესახებ გავრცელებული ინფორმაცია. როგორც ნანავამ ჟურნალისტებს განუცხადა, ეს ინფორმაცია მან სწორედ სოციალური ქსელის საშუალებით გაიგო.

„არაფერი ვიცი, ნამდვილად მოულოდნელი იყო მისი ეს განცხადება ჩემთვის. გოგიას გადაწყვეტილების მოტივი ჩემთვის უცნობია და მასთან კომუნიკაცია არ მქონია. ჩამოვა ჩეხეთიდან და გაირკვევა ყველაფერი”, - განაცხადა ნანავამ.

რაც შეეხება ვიცე-მერ გია გულორდავას შესაძლო გადადგომის შესახებ გავრცელებულ ინფორმაციას, ნანავას თქმით, არც ამასთან დაკავშირებით იცის რამე. თავად გულორდავა სამსახურში ჯერ არ გამოჩენილა.

ზუგდიდის მერმა ლაშა გოგიამ, თანამდებობის დატოვებს შესახებ პოსტი „ფეისბუქის“ საკუთარ გვერდზე გუშინ, გვიან ღამით, დაწერა.

მერიის პრესსამსახურის ცნობით, გოგია მივლინებით პრაღაში იმყოფება და საქართველოში 14 სექტემბერს უნდა ჩამოვიდეს.