ბათუმი საერთაშორისო საზღვაო ფორუმს მასპინძლობს

აჭარის ავტონომიური რესპუბლიკის უმაღლესი საბჭოსა და მთავრობის თავმჯდომარეები - დავით გაბაიძე და თორნიკე რიჟვაძე, უმაღლესი საბჭოს წევრები ლადო მგალობლიშვილი და ცოტნე ანანიძე, რეგიონის მთავრობისა და ბათუმის თვითმმართველობის წარმომადგენლებთან ერთად, სასტუმრო „შერატონში“ საერთაშორისო საზღვაო ფორუმს დაესწრნენ. ამის შესახებ „ინტერპრესნიუსს“ აჭარის ავტონომიური რესპუბლიკის უმაღლესი საბჭოს პრესსამსახურიდან აცნობეს.

მათივე ინფორმაციით, ფორუმის მიზანი მსოფლიოს მასშტაბით, საქართველოს, როგორც საზღვაო ქვეყნის პოპულარიზაციაა. მას საზღვაო ინდუსტრიის მაღალი რანგის წარმომადგენლები, მათ შორის საერთაშორისო საზღვაო ორგანიზაციის - IMO-ს გენერალური მდივანი ლიმ კიტაკი, მსოფლიოს სხვადასხვა ქვეყნის საზღვაო ადმინისტრაციების ხელმძღვანელები, ევროკომისრები, საზღვაო სფეროსა და ტრანსპორტის მინისტრები, ბიზნესმენები, ქართული და უცხოური მედიის წარმომადგენლები ესწრებიან.

„Georgia Iternational Meritime Forum 2018-ს” ბათუმი მეორედ მასპინძლობს და იგი საქართველოს პრემიერ-მინისტრის მამუკა ბახტაძის პატრონაჟით ტარდება. მას ორგანიზებას უწევენ საქართველოს ეკონომიკისა და მდგრადი განვითარების სამინისტრო და საქართველოს საზღვაო ტრანსპორტის სააგენტო.