საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი, დაბა მესტიაში, ლეო ფილფანის სახელობის სახალხო და ფოლკლორის თეატრის რეაბილიტაციას ახორციელებს.

როგორც „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს, პროექტი მსოფლიო ბანკის დაფინანსებით ხორციელდება და მისი ღირებულება დაახლოებით 4.7 მილიონი ლარია. სამუშაოების მიმდინარეობას მუნიციპალური განვითარების ფონდის აღმასრულებელი დირექტორი გიორგი შენგელია ადგილზე გაეცნო.

„პროექტი ითვალისწინებს არსებული შენობის სრულ რეაბილიტაციას. ასევე, საზაფხულო ამფითეატრის და ღია ავტოსადგომის მოწყობას, შენობის ტერიტორიის კეთილმოწყობას და შემოღობვას.

პროექტის მიზანია, მესტიის მუნიციპალიტეტში მოსახლეობის ცხოვრების პირობების გაუმჯობესება და სპორტული ინფრასტრუქტურის შექმნა. სარეაბილიტაციო სამუშაოები მიმდინარე წლის ბოლოს დასრულდება“, - ნათქვამია სამინისტროს ინფორმაციაში.