ფინანსთა მინისტრი ივანე მაჭავარიანი მზადყოფნას გამოთქვამს, ყველა საკითხი მძღოლებთან ერთად გაიაროს, რათა არსებული პრობლემები უმტკივნეულოდ მოგვარდეს.

მაჭავარიანის განცხადებით, პროცესები გამჭვირვალედ წარიმართება და არავის ლობირება არ მოხდება. ფინანსთა მინისტრმა განმარტა, რომ ავტომობილებით განხორციელებული ტვირთბრუნვა სერიოზულ პრობლემებს ქმნიდა საავტომობილო მონაკვეთზე, რაც ქვეყანაში ტურისტული ნაკადის შემოსვლასაც მნიშვნელოვნად აფერხებდა.

თავის მხრივ, ტრაილერების მძღოლების აქციის მონაწილეთა ის ნაწილი, რომელიც შეხვედრაზე იმყოფება, აცხადებს, რომ მინისტრს არ აქვს სწორი და სათანადო ინფორმაცია. მათი ნაწილი აღნიშნავს, რომ შესაძლოა გზებზე გრაფიკი დაწესებულიყო, რომლის ამოქმედების შემთხვევაში, სატვირთო ავტომობილების გადაადგილება გარკვეული საათების განმავლობაში აიკრძალებოდა.

მძღოლების ნაწილი ასევე პრეტენზიას გამოთქვამს და აღნიშნავს, რომ სახელმწიფო, ამ შემთხვევაში ფინანსთა სამინისტრო არ ითვალისწინებს იმ პრობლემებსა და საჭიროებებს, რომლებიც მათ გააჩნიათ. მათ შორის, ფინანსურ დავალიანებებს ბანკებთან. ისინი მინისტრისგან მოითხოვენ გააუქმოს მიღებული დადგენილება.

თავის მხრივ კი, მინისტრი მათ ერთობლივი მუშაობისთვის გარკვეულ პერიოდს სთავაზობს, რაც მძღოლების ნაწილისთვის მიუღებელია.